Në rubrikën “Sy m’sy” kryeministri Edi Rama iu është përgjigjur sot pyetjeve dhe komenteve të qytetarëve në platformat sociale.

“Garanci që drejtësia të jetë e pavarur, aty ka qenë Amerika, tani që Amerika pritet të tërhiqet nga pushteti i drejtësisë ajo s’ka për të qenë asnjëherë e pavarur, ka për t’i shërbyer pushtetit të radhës”, ishte një nga komentet e qytetarëve në rrjetet sociale.

Kreu i qeverisë tha se Reformën në Drejtësi nuk e solli Amerika (SHBA), ndërsa shtoi se drejtësi që i shërben pushtetit nuk do të ketë më sa kohë që Partia Socialiste do të jetë në pushtet.

“Drejtësia e pavarur për aq sa është pavarësuar dhe për aq sa po kontribuon, dhe nuk po kontribuon pak në përpjekjen tonë të përbashkët për t’u ulur në tryezën e përbashkët, për të ulur Shqipërinë në tryezën e BE-së, është fryt i vizionit, vullnetit dhe i përpjekjes titanike të Partisë Socialiste të Shqipërisë. Nuk e solli Amerika dhe Amerika nuk e merr dot me vete kur ikën, sepse jemi ne këtu. E kemi shkruar në programet tona qysh kur ishim në opozitë, qysh kur udhëhoqa zgjedhjet e para në opozitë, është fryt i qëndrimit tonë të prerë”, u shpreh Rama.

“Po të ishim kundër drejtësisë, atëherë ne do të ishim këtu pa asgjë që shikon, dhe komenton sikur i ka bërë Amerika. Amerika ka dhënë një mbështetje të madhe bashkë me BE në procesin e luftës, por pavarësia e institucioneve të drejtësisë varet nga Partia Socialiste. Nëse Partia Socialiste e lëshon këtë llogore, e keni parë shumë mirë që të tjerët janë të rreshtuar në luftën kundër institucioneve të drejtësisë e kriminalizimit dhe bombardimit të SPAK, dhe të drejtuesit të SPAK nga gjithfarëlloj shpifjesh, akuzash, shantazhesh, fyerje e kështu me radhë”, tha Rama.

“Ji i sigurt se drejtësi që i shërben pushtetit të radhës nuk do të ketë, sa kohë që PS të jetë në pushtet me mua në krye ose më tutje, pas 2030-ës, me këdo tjetër që do të marrë këtë stafetë, kur ne të jemi anëtarë të BE-së”, nënvizoi Rama.

Burimi ATSH