Tirana mikpriti sot Samitin e “Pact of Free Cities”, me pjesëmarrjen e 20 kryebashkiakëve dhe përfaqësues nga metropolet më të mëdha të Europës dhe botës, të cilët ndanë eksperiencat dhe perspektivat mes tyre për zhvillimin e qëndrueshëm dhe forcimin e bashkëpunimit.

Samitin e përshëndeti edhe Kryeministri Edi Rama, i cili tha se, sot, kryeqyteti i Shqipërisë, Tirana është kthyer në një platformë të jashtëzakonshme të arkitekturës bashkëkohore me projekte interesante arkitektësh prestigjiozë dhe ky është vetëm fillimi i një gjerdani goxha të gjatë veprash mbresëlënëse të kësaj arkitekture.

Rama tha se samite të tilla është e mira që të zhvillohen më shpesh që qytetet europiane mes tyre të ndajnë eksperiencat.

“Kjo aleancë qytetesh jo vetëm që iu vlen, por është gjithnjë e më e domosdoshme sepse gjithmonë e më shumë sipas meje, qytetet do të mbajnë barrën e sfidave të përditshme të njerëzve të kësaj kohe dhe në rast se qeveritë mund të bëjnë diçka më shumë ose diçka më pak është e pamundur që të zëvendësojmë atë që qytetet duhet bëjnë për njerëzit dhe nga ana tjetër është e pamundur që të pretendosh që njerëzit të mjaftohen me çka u ofron qyteti dhe pastaj të kërkojnë gjëra të cilat janë përtej qytetit. Qyteti për njerëzit është shtëpia dhe padyshim që ambicia dhe dëshira e nevoja për ta bërë gjithnjë e më mirë shtëpinë është e pakufizueshme”, tha Rama.

“Uroj shumë që përveç këtij takimi të përbashkët, Tirana të zhvillojë sa më shumë edhe marrëdhënie dypalëshe me të gjitha qytetet e pranishme edhe me të tjera qytete sepse duke pasur këtë jetë të përditshme pavarësisht në cilën pikë gjeografike të Europës, me sfida shumë të ngjashme është edhe mundësia e një eksperience që akumulohet në të njëjtën kohë në shumë vende dhe e të ndarit të sukseseve, por edhe të dështimeve me të tjerët dhe përfitimit nga të tjerët të eksperiencës së tyre në mënyrë që të evitohen sa më shumë dështime ose gabime dhe të shumëfishohen sa më shumë vendime të duhura dhe suksese”, shtoi Rama.

Kryeministri në fund pati dhe një “falënderim personal për Barcelonën dhe Amsterdamin sepse janë dy qytete në të cilat unë kam mësuar shumë dhe besoj se çfarë ne kemi bërë në Tiranë në atë periudhë nuk do ishte aq sa ç’ishte dhe nuk do të kishte shërbyer për të filluar rilindjen e Tiranës nëse nuk do të kishte qenë marrëdhënia dhe komunikimi me Barcelonën dhe Amsterdamin”, përfundoi Rama.

Burimi ATSH