Kryeministri Edi Rama njoftoi sot se është drejt finalizimit marrëveshja me Emiratet e Bashkuara Arabe për monitorimin me kamera të shkollave.

Gjatë konsultimit publik me prindërit e shkollës “Sami Frashëri” në kryeqytet për kufizimin apo ndalimin e platformave Tik-Tok apo dhe Snapchat, Rama u ndal te masat që po merr qeveria për të garantuar sigurinë në shkolla.

“Ne kemi një projekt që e kemi filluar prej afro 1 viti dhe po e finalizojmë si projekt tani, besoj se deri në fund të dhjetorit firmosim marrëveshjen. Bëhet fjalë për një sistem komplet të ri të monitorimit të shkollave me teknologji dhe nga ana tjetër një financim të konsiderueshëm që do ta marrim në marrëveshje me qeverinë e Emirateve të Bashkuara”, tha Rama.

Kryeministri theksoi se bëhet fjalë për një sistem të testuar dhe provuar më së miri në Emiratet e Bashkuara me rezultate të jashtëzakonshme që mundësojnë ndjekjen në kohë reale me kamera të gjithë procesit mësimor dhe gjithë jetës brenda mureve të oborrit të shkollës.

“Çdo prind, në çdo kohë mund të ketë akses për të parë fëmijën, klasën, aktivitetin, mësuesin, duke thjeshtë bërë një kërkesë pranë shkollës dhe çdo lloj situate jashtë disiplinës mësimore është e regjistruar. Rezultatet e atij sistemi janë nxjerrë nga një ndjekje që i është bërë atje punës së sistemit dhe gjithë ndryshimeve që ka sjellë vendosja e sistemit dhe faktikisht ka një rënie drastike të rasteve të bullizmit, të rasteve të dhunës, e kështu me radhë”, u shpreh Rama.