Kryeministri Edi Rama tha sot se “Raporti i Progresit 2024 për Shqipërinë e konfirmon në tërësinë e vet edhe këtë vit vazhdimin e rritjes ekonomike të vendit dhe përgatitjen e mëtejshme të Shqipërisë për një ekonomi tregu funksionale në bazë të parimeve dhe të kushteve që garanton Bashkimi Europian në çdo vend anëtar të tij”.

“Rritja ekonomike ka qenë një rritje e fortë, thotë raporti, siç është e vërteta dhe po ashtu mbështetja e kësaj rritje në rritjen e turizmit dhe në investimet në rritje, është një fakt”, theksoi Rama, gjatë konferencës së përbashkët për shtyp me ambasadorin Gonzato.

Nga ana tjetër, vijoi Rama, raporti vlerëson performancën e përmirësuar dukshëm fiskale të vendit, rënien e deficitit dhe uljen e mëtejshme të borxhit publik dhe nënvizon që sektori financiar i vendit është i qëndrueshëm.

Më tej Rama tha se “ka një pikë, që unë e vlerësova ta ndaj veç në këtë paraqitje shumë të përmbledhur, është progresi i mirë dhe afrimi më shumë drejt kritereve për anëtarësim në BE në fushën e energjisë, që është një fushë kritike me një karakter strategjik gjithnjë e më të theksuar edhe për vetë kushtet e sotme globale dhe të Europës, përafrimin me tregun e energjisë dhe standardet e BE dhe në fushën e certifikimit të operatorëve përkatës”.

“Vazhdimi i punës dhe rritja e investimeve në energji, por edhe mbështetja ndaj qytetarëve dhe biznesit si dhe ambicia për t’u bërë një vend eksportues neto i energjisë brenda kësaj dekade dhe pjesë e tregut europian të energjisë, janë elementë shumë të rëndësishëm që pasqyrojnë ekzaktësisht transformim epokal që kemi bërë dhe vazhdojmë të bëjmë në sektorin e energjisë”, tha Rama.

Sa i përket digjitalizimit, Rama tha se “Shqipëria është një lider në digjitalizim dhe gjithë procesi i transformimit të shërbimeve publike është një proces që na ka vendosur në një bazë shumë të mirë për të bërë zhvillime të mëtejshme”.