Ministri i Drejtësisë, Toni Gogu, gjatë tryezës së organizuar sot me partnerët e sistemit të drejtësisë, tha se financimi i sistemit të drejtësisë në Shqipëri ka njohur një rritje të ndjeshme gjashtë viteve të fundit.

Sipas tij, buxheti i shtetit për sistemin e drejtësisë nga 66 milionë euro në vitin 2020 në 135,6 milionë euro aktualisht, duke shënuar një rritje prej më shumë se 105 për qind në gjashtë vite. Gogu bëri të ditur gjithashtu se gjatë kësaj periudhe janë shtuar 709 vende pune në sistemin e drejtësisë.

“Në vitin 2020, buxheti i shtetit për sistemin e drejtësisë ishte 66 milionë euro. Sot është 135,6 milionë euro, një rritje prej më shumë se 105 për qind në gjashtë vite. Gjatë kësaj periudhe janë shtuar 709 vende pune në sistem”, tha Gogu.

Ministri nënvizoi se mbështetja e partnerëve ndërkombëtarë për periudhën 2025–2027 arrin në rreth 43,8 milionë euro.

“Mbështetja e partnerëve për periudhën 2025–2027 arrin rreth 43,8 milionë euro, një kontribut i rëndësishëm dhe strategjik që plotëson investimin e shtetit shqiptar. Modeli që besoj se duhet të bëhet standard është ai i bashkëfinancimit”, tha ai.

Duke sjellë si shembull projektet për digjitalizimin e sistemit të drejtësisë, Gogu tha se për sistemin ICMS (Juronix + CAMS), Suedia ka kontribuar me 2,5 milionë euro, ndërsa qeveria shqiptare me 9,6 milionë euro nga buxheti i shtetit.

“Për sistemin ICMS (Juronix + CAMS), Suedia kontribuoi me 2,5 milionë euro, ndërsa qeveria shqiptare 9,6 milionë euro nga buxheti i shtetit”, tha ai.

Nga ana tjetër, Bashkimi Evropian sipas Gogut ka financuar me 7,5 milionë euro sistemin CAMS të prokurorisë.

“Ky është partneritet. Ky është bashkëfinancim”, tha Gogu.

Burimi ATSH