Ministri i Infrastrukturës dhe Energjisë, Enea Karakaçi siguroi sot se punimet në gjithë aksin e Korridorit VIII po vijojnë normalisht, pa asnjë ndalesë.

Në një takim me banorët e prekur nga shembja e rrugës Librazhd-Përrenjas, Karakaçi u shpreh se në këtë aks janë marrë të gjitha masat për të vijuar në një mënyrë sa më shpejtë qarkullimi normal.

“Strukturat jo vetëm të ARRSH-së dhe të Shërbimit Gjeologjik Shqiptar, të Hekurudhës por edhe të Energjisë kanë marrë masat e nevojshme. Ju e dini që është spostuar një linjë transmetimi e cila është transferuar në një në kohë rekord për të mos krijuar shqetësime të mëtejshme nga pikëpamja e energjisë elektrike”, shtoi ai.

Duke folur për ecurinë e punës në Korridorin VIII, Karakaçi theksoi se Korridori prej rreth 33 kilometrash është tashmë i kontraktuar nga ARRSH.

“Në të tetë fazat ka një ecuri krejtësisht normale dhe nuk ka pasur asnjë ndalese në punimet përkatëse të këtij Korridori. Madje në fillimet e tij që është segmenti i tretë, i dytë dhe i parë që është në dalje të Elbasanit, qytetarët mund dhe të konstatojnë që janë shtruar dhe shtresat asfaltike të njërës korsi dhe po vijohet dhe me korsinë tjetër”, shtoi ministri.

E vetmja ndalesë, sipas tij, “ka qenë në këtë aks prej 150 metrash”.

“Do të bëhet rruga sekondare që është 1,3 kilometra që do lejojë kalimin e automjeteve derisa kontraktori të vazhdojë punimet dhe në këtë segment”, shtoi Karakaçi.

Ministri vlerësoi se ky është një Korridor, dhe ndër veprat më të rëndësishme infrastrukturore të Shqipërisë, që e fut vendin në një fazë tjetër zhvillimi ekonomik.

“Korridori VIII bën ndërlidhjen e Shqipërisë me gjithë pjesën tjetër të rajonit të Ballkanit. Të gjitha segmentet e tjera kanë ecur sipas fazave kontraktore. Ne presim që brenda një viti, përveç këtij segmentit këtu, të kemi mbylljen e tyre sipas afateve kontraktore dhe do vazhdojmë me ritmet përkatëse të duhura siç dhe duke punuar tashmë në të gjitha pjesët e këtij korridori”, siguroi Karakaçi.

/Marrë nga ATSH