Ministrja e Ekonomisë dhe Inovacionit, Delina Ibrahimaj, zhvilloi sot një takim me mësues të arsimit profesional në vend, ku u përcolli urimet dhe mirënjohjen e saj me rastin e 7 Marsit, Ditës Kombëtare të Mësuesit.

“Gëzuar 7 Marsin të gjithë mësuesve! Një mirënjohje të veçantë mbi 1,700 mësuesve të arsimit profesional, që çdo ditë përgatisin të rinjtë me aftësi, dije dhe profesion për të ardhmen. Falë përkushtimit tuaj, shkolla është vend ku formohen breza të rinj, ndërtohen ëndrra dhe forcohet e ardhmja e vendit”, u shpreh ministrja Ibrahimaj.

Ministrja Ibrahimaj theksoi rëndësinë e arsimit profesional si një shtyllë të zhvillimit të qëndrueshëm ekonomik të vendit, duke ofruar mundësi konkrete për të rinjtë që të aftësohen në profesionet e kërkuara dhe të kontribuojnë në tregun e punës me kompetenca të specializuara.

“Puna juaj siguron që çdo student i arsimit profesional të dalë nga shkolla i gatshëm për sfidat e tregut dhe për të ndërtuar të ardhmen e vet dhe të vendit”, shtoi ajo.

Arsimi i mesëm profesional u ofron nxënësve mundësi kualifikimi dy, tre dhe katërvjeçar, dhe i përgatit ata për profesione specifike, nëpërmjet zhvillimit të aftësive praktike dhe njohurive të aplikueshme.

Sistemi publik i arsimit dhe formimit profesional përfshin 41 institucione, nga të cilat 31 janë shkolla profesionale dhe 10 janë qendra formimi.

Këto institucione ofrojnë kualifikime profesionale të nivelit të mesëm, përfshirë edhe programe të arsimit profesional në formën e dyfishtë, kualifikime pas të mesme dhe programe formimi afatshkurtra, të përshtatura për të gjitha grupmoshat.

Burimi ATSH