Shefja e Politikës së Jashtme të BE-së, Kaja Kallas dhe Komisionerja për Zgjerimin e BE-së, Marta Kos, kanë publikuar sot gjetjet kryesore të progresraportit të miratuar nga KE për vitin 2025 për vendet kandidate në BE.

Raportet për vendet kandidate ofrojnë një vlerësim të detajuar të gjendjes aktuale dhe progresit të bërë si dhe ofrojnë udhëzime mbi reformat kryesore që secili partner i zgjerimit duhet të përmbushë në rrugën drejt BE-së.

Komisionerja Kos deklaroi se “Shqipëria ka bërë progres të paprecedentë që prej konferencës ndërqeveritare në tetor 2024. Ka hapur 5 nga 6 grup-kapituj, ndërsa i mbeturi mund të hapet këtë nëntor”.

“Ky rezultat i jashtëzakonshëm është një shenjë e qartë e angazhimit të fuqishëm politik të Shqipërisë dhe aspiratës europiane të shoqërisë së këtij vendi, ku 91% e qytetarëve mbështesin anëtarësimin në BE”, deklaroi Kos.

Komisionerja theksoi se Shqipëria ka bërë përparim të dukshëm në reformat e kapitujve themelorë dhe se është i mundur mbyllja e të gjithë procesit në 2027.

“Një vend nuk duhet të ketë dy kategori. Procesi i integrimit për të mbyllur kapitujt deri në vitin 2027 është i mundur. Por, sigurisht, mbetet ende shumë rrugë përpara”, shtoi ajo.

E pyetur nga gazetarët nëse mund të arrijë Shqipëria të mbyllë të gjithë grup-kapitujt pa arritur të zgjidhë çështjen e kufirit detar me Greqinë, Kos u përgjigj: “Ka grup-kapituj dhe çështje që kanë të bëjnë me procesin e zgjerimit që i përfshijnë çështjet dypalëshe. Deri tani Shqipëria ka qenë e aftë që të arrijë të zgjidhë të gjitha problemet dypalëshe. Kam optimizmin e duhur që Shqipëria do të arrijë ta zgjidhë edhe këtë çështje me Greqinë në të ardhmen e afërt”.

Burimi ATSH