Guvernatori i Banka e Shqipërisë, Gent Sejko dhe ministri i Financave, Petrit Malaj zhvilluan një takim me drejtorin Ekzekutiv për Shqipërinë në Fondi Monetar Ndërkombëtar (FMN), Riccardo Ercoli, ku në qendër të bisedimeve ishin zhvillimet më të fundit në ekonominë botërore dhe atë shqiptare.

Gjatë takimit u vlerësua ecuria pozitive e ekonomisë shqiptare, e cila sipas Guvernatorit, pavarësisht sfidave ndërkombëtare ka ruajtur ritmet e qëndrueshme të rritjes dhe një nivel të ulët të inflacionit.

Drejtori Ekzekutiv për Shqipërinë në FMN, Riccardo Ercoli, shprehu vlerësimin për reformat e ndërmarra nga Banka e Shqipërisë në drejtim të forcimit të stabilitetit financiar dhe ruajtjes së stabilitetit të çmimeve në vend.

Palët theksuan rëndësinë e vazhdimit të bashkëpunimit ndërinstitucional dhe të asistencës teknike në mbështetje të zhvillimeve të ardhshme ekonomike.

Takimi u zhvillua në kuadër të mbledhjes vjetore të FMN-së dhe BB-së 2025 në Uashington DC. Mbledhjet përfaqësojnë një forum të nivelit të lartë, ku vendimmarrësit më të lartë të FMN-së dhe BB-së, së bashku me guvernatorët dhe ministrat e financave të vendeve anëtare në këto institucione ndërkombëtare financiare, mblidhen së bashku për të diskutuar zhvillimet më të fundit të ekonomisë botërore.

Burimi ATSH