Këshilli i Lartë i Prokurorisë (KLP) hapi sot aplikimet për drejtuesin e ri të Strukturës së Posaçme kundër Korrupsionit dhe Krimit të Organizuar (SPAK).

Ambasadori i Gjermanisë në vendin tonë, Karl Bergner nisur nga ky zhvillim, me anë të një postimi në rrjetet sociale, bëri thirrje për një proces transparent, të bazuar në meritë dhe i lirë nga ndikimi i jashtëm.

Bergner vlerësoi punën e bërë nga drejtuesi aktual i SPAK Altin Dumani në luftën kundër korrupsionit dhe krimit të organizuar.

“Në vitet e fundit, nën udhëheqjen e Altin Dumanit, SPAK ka dhënë kontribute të jashtëzakonshme në luftën kundër korrupsionit dhe krimit të organizuar në Shqipëri. Besimi i madh i popullsisë shqiptare dhe partnerëve ndërkombëtarë të Shqipërisë në punën e SPAK e thekson në mënyrë mbresëlënëse këtë”, u shpreh ambasadori gjerman.

“Procesi i nisur sot nga Këshilli i Lartë i Prokurorisë për të zgjedhur kreun e ardhshëm të SPAK duhet të jetë transparent, i bazuar në meritë dhe i lirë nga ndikimi i jashtëm”, tha Bergner.

Diplomati gjerman theksoi se pavarësia e gjyqësorit është kriter kyç për anëtarësimin ne Bashkimin Evropian.

“Pavarësia e gjyqësorit, e cila duhet të demonstrohet në procesin e nisur sot, por edhe në veprimet e përditshme të organeve ekzekutive dhe legjislative, është një kriter kyç për Gjermaninë në lidhje me sundimin e ligjit dhe nivelin e përgatitjes së Shqipërisë për anëtarësim në BE”, vuri në dukje ai.

Prokuroria e Posaçme kundër Korrupsionit dhe Krimit të Organizuar është një prej institucioneve të krijuara nga Reforma në Drejtësi.

Në mbledhjen e sotme anëtarët e KLP-së shpallën vendin vakant për kreun e SPAK dhe caktuan një afat 3-javor për paraqitjen e dokumentacionit të kandidatëve, deri më 8 tetor 2025.

Drejtuesi i ri i Prokurorisë së Posaçme do të zgjidhet mes prokurorëve ekzistues të SPAK-ut për një mandat 3-vjeçar pa të drejtë rikandidimi. Altin Dumani është drejtuesi i dytë i SPAK-ut që nga krijimi i institucionit, pas Arben Krajës.

Burimi ATSH