Kryeministri, njëherësh kryetari i Partisë Socialiste, Edi Rama deklaroi sot se, ngritja e agro-turizmave sjell përfitim për komunitetin dhe zhvillim ekonomik

Në fjalën e tij në Asamblenë e Partisë Socialiste në Njësinë 12 në Tiranë, që përfshin zonat Dajt, Shëngjergj, Zallbastar, Petrelë dhe Baldushk, Rama u shpreh se, në këtë zonë për Paketën e Maleve janë paraqitur afro 100 aplikime.

“Kjo është diçka që i intereson jo thjesht 100 individëve apo familjeve të tyre që duan të investojnë në programin e ri, por ka interes për të gjithë komunitetin,” tha Rama.

Ai shtoi se investimet e mundshme në agroturizëm dhe bujtina do të krijojnë vende pune për banorët e zonës dhe do të nxiten aktivitetet ekonomike lokale.

“Po jo vetëm do të punësohen njerëz nga kjo zonë, por aty krijohet më shumë ekonomi, sepse agroturizmi është i lidhur me prodhimin e zonës,” u shpreh Kryeministri.

Rama theksoi rëndësinë e komunikimit dhe diskutimit të ideve brenda partisë.

“Nëse ne nuk do ta diskutojmë këtë me njëri-tjetrin, nuk do të arrijmë të shfrytëzojmë potencialin e plotë. Për këtë arsye kemi bërë këtë ndarje të re organizative të partisë në blloqe më të vogla, për të pasur më shumë kapacitet komunikimi”, tha kryeministri.

Burimi ATSH