Shkodra po përjeton transformim urban me një sërë projektesh të reja që aktualisht po zbatohen në lagjet kryesore të qytetit, me vlera të spikatura historike dhe arkitekturore, mes të cilave edhe zona historike 300 vjeçare e Zdrales, programi për vitalizimin urban të së cilës, u lançua një vit më parë nga Bashkia e Shkodrës.

Kryebashkiaku i Shkodrës, Benet Beci tha sot se “transformimi i zonës në Zdrale po merr formë të plotë”.

Sipas Becit, në këtë fazë të projektit “ka përfunduar shtrimi i pedonales, janë restauruar thuajse të gjitha çatitë dhe fasadat e banesave e bizneseve, si edhe është vendosur sistemi i ndriçimit dhe është realizuar edhe pjesa dekorative e rrugës”.

“Një investim transformues që po i jep një pamje të re kësaj zone historike dhe përmirëson ndjeshëm cilësinë e jetesës për banorët dhe bizneset aty”, pohoi Beci në një postim në rrjetet sociale.

Projekti për rivitalizimin e Zdrales përbën një investim prej 2.5 milionë eurosh, ndërsa kryebashkiaku i Shkodrës është shprehur më herët se më këtë projekt “dyert standardizohen me dritare, me ballonë, pjesa e fasadave, pjesa e xhamave, dyqaneve, komplet”.

“Kemi sfidë tani për të zgjidhur me telat, infrastruktura e poshtme është bërë, duhet kaluar e gjithë infrastruktura poshtë që të mos kemi fare tela varura. Edhe dyqanet do unifikohen, të gjitha dyqanet me kornizat, me hyrjet”, u shpreh Beci.

Burimi ATSH