Ministrja e Shëndetësisë dhe Mbrojtjes Sociale, Albana Koçiu, sot në rrjetet sociale ka pasqyruar përmirësimet e fundit në Spitalin Universitar të Traumës, një ndër institucionet më të rëndësishme të emergjencës në vend, ku çdo vit trajtohen mbi 70,000 raste urgjente.

“Ky është një nga spitalet më të rëndësishme për emergjencat në vend, dhe investimet e vazhdueshme në teknologji të avancuar po sjellin ndryshime reale në cilësinë e kujdesit që marrin pacientët”, shkruan ministrja, duke theksuar fokusin te siguria dhe trajtimi cilësor i pacientëve.

Gjatë vizitës në shërbimin e ORL-së dhe okulistikës, ministrja Koçiu e shoqëruar edhe nga ministri i Mbrojtjes, Pirro Vengu, vlerësoi vendosjen në funksion të pajisjeve moderne, si: Fibronazolaringoskop – për ekzaminime të detajuara të rrugëve të sipërme të frymëmarrjes; Audiometër – për vlerësimin e dëgjimit; Videonistagmograf – për diagnostikimin e çrregullimeve të ekuilibrit; OCT dhe tomografi korneale – për diagnostikimin e sëmundjeve të syrit; Eko okulare dhe lazerë të specializuar – për trajtimin e traumave okulare.

“Një investim i prekshëm, me fokus te pacienti dhe siguria e trajtimit”, përfundon ministrja Koçiu, duke nënvizuar angazhimin për të përmirësuar infrastrukturën dhe teknologjinë në shërbim të qytetarëve.