Një delegacion i Federatës Shqiptare të Futbollit zhvilloi një vizitë zyrtare në Bashkinë Shkodër, ku Sekretari i Përgjithshëm i FSHF, Ilir Shulku u prit në takim nga Kryetari i Bashkisë Benet Beci e ku ishin të pranishëm edhe përfaqësues të tjerë të dy institucioneve. Takimi u fokusua në forcimin e bashkëpunimit institucional dhe avancimin e projekteve infrastrukturore në shërbim të futbollit, në kuadër të përgatitjeve për finalet e Kampionatit Europian U-21.

Gjatë diskutimeve u trajtuan çështje të rëndësishme që lidhen me ndërhyrjet në stadium dhe identifikimin e terreneve stërvitore e ndihmëse që do të shërbejnë për zhvillimin e këtij eventi të rëndësishëm europian.

Në përfundim të takimit, palët arritën një mirëkuptim për disa drejtime konkrete bashkëpunimi. Bashkia Shkodër konfirmoi angazhimin për të marrë përsipër ndërhyrjet infrastrukturore në stadium, në përputhje me nevojat e identifikuara. Gjithashtu, u shpreh gatishmëria për bashkëpunim në zhvillimin e kompleksit sportiv “Zmijani”, sipas kushteve të dakordësuara mes palëve.

Në kuadër të kësaj vizite u zhvilluan edhe inspektime në disa terrene potenciale stërvitore, konkretisht në zonën e Postribës, Barbullushit, si dhe në fushën e “Soccer Star Academy” në fshatin Shtoj.

Palët ranë dakord që në vijim të ndërmerren hapa konkretë për finalizimin e ndërhyrjeve prioritare në stadium, realizimin e vlerësimeve teknike të detajuara për terrenet në shqyrtim dhe formalizimin e dakordësive përmes dokumentacionit përkatës zyrtar.

Kjo vizitë përfaqëson një hap të rëndësishëm drejt përmirësimit të infrastrukturës sportive dhe krijimit të kushteve më cilësore për zhvillimin e futbollit në qytetin e Shkodrës, si pjesë e përgatitjeve për organizimin e një kompeticioni të rëndësishëm europian.

Burimi ATSH