Drejtuesi politik i Partisë Socialiste në qarkun e Korçës, Niko Peleshi tha sot se Maliqi do të jetë forca më e madhe e qarkut drejt fitores në zgjedhjet e 11 majit.

Në takimin elektoral me qytetarë të Maliqit, ku ishte i pranishëm edhe kryeministri Edi Rama, Peleshi tha se “vendosëm ta fillojmë nga këtu për të marrë energjinë dhe entuziazmin e Maliqit. Maliqi me Partinë Socialiste janë të lidhura ngushtë. Kjo zonë ka votuar gjithmonë PS-në, e ka mbështetur në ditë të mira dhe të vështira. Sot, në rrugëtimin më të bukur të PS-së bashkë me Shqipërinë drejt BE-së, Maliqi do të jetë forca jonë më e madhe”.

“Sot do shkojmë në shumë zona të qarkut tonë. Edhe këtu në Maliq pamë një punë të bukur, do shohim një tjetër, për të treguar që Europa që po vjen kaq afër, jemi tek pragu i saj. Nuk është vetëm një fat historik, por edhe meritë e punës së përbashkët dhe ka një emër: Partia Socialiste. Qeveria e saj për 12 vite ka punuar në gjithë Shqipërinë, në fshat, qytet, Maliq, në gjithë qarkun tonë, për të arritur në këtë ditë, për të qenë syhapur dhe ballëlartë, ku të kërkojmë vendin tonë që na takon në BE”, tha Peleshi.

Burimi ATSH