Kryeministri Edi Rama, njëkohësisht kryetar i Partisë Socialiste u shpreh sot se Shqipëria ka pasur mbi krye njerëz që nuk kanë pasur kurajon të qëndrojnë drejt përballë fqinjëve dhe të mëdhenjve të Europës e botës e të kërkojnë respekt, por kanë dhënë servilizëm dhe kanë pranuar edhe poshtërim.

Në një takim me shqiptarët në Athinë, Greqi, në kuadër të turit të takimeve me diasporën, Rama u shpreh se kjo ka bërë që të huajt të na shikojnë si përfaqësues të një shteti që nuk meriton respekt dhe vlerësim, por sot kjo ka ndryshuar.

Kryeministri hoqi paralel me situatën në të cilën janë gjendur emigrantët shqiptarë kur kanë ardhur në Greqi.

“Nëse doni të dini se për çfarë ka nevojë Shqipëria në 11 maj bëni vetëm historikun e thjesht të tuajin dhe familjes tuaj. Të gjithë kanë parë momente të rrugës ku vështirësitë, poshtërimet kanë qenë të patregueshme dhe ku për të ardhur në ditën që fqinjëve tuaj rreth e rrotull mos të jeni të detyruar t’u thoni mirëmëngjesi kur nuk ju thonë ju është dashur të luftoni shumë dhe për një kohë të gjatë”, tha Rama.

Kryeministri theksoi se shqiptarët jashtë i janë imponuar tashmë vendit ku jetojnë dhe marrin respekt.

Po ashtu Rama vlerësoi se falë zgjedhjes së tyre të guximshme dhe shumë të vështirë për të shkuar në emigracion ata kanë shpëtuar veten dhe familjen e tyre, por kanë shtuar fuqinë e Shqipërisë që të ngrihet më shpejt dhe të eci më shpejt.

“Ju i duheni vendit në 11 maj për të vënë vulën mbi gjithë këtë proces që ne së bashku kemi ndërmarrë me shumë vështirësi dhe për të realizuar atë që është detyrimi i fundit që çdo prind i ka fëmijëve të vetë që t’i japë pasaportën europiane dhe t’i thotë mësoje gjuhën greke, italiane e franceze, mësoje kulturën e Europës por nuk ke nevojë të ndryshosh atë që je dhe e ke të shkruar në pasaportën tënde shqiptare. Sepse me këtë pasaportë që unë të bëra të mundur duke u bashkuar me Edi Ramën dhe PS-në në 11 maj të 2025 ti ke mundësi të qëndrosh këtu, të shkosh në çdo vend që do të Europës dhe të të respektojnë si europian i barabartë mes evropianësh”, tha Rama.