Kryeministri Edi Rama ftoi sot shqiptarët që ndodhen jashtë vendit të kthehen dhe të investojnë në Shqipëri, ndërsa u shpreh se fshati është një minierë e pashfrytëzuar.
Në një takim në Sarandë me sipërmarrës që janë kthyer në Shqipëri për të investuar, Rama u shpreh se Shqipëria është bekim pasi ka bukuri në çdo cep.
“Amerika është këtu dhe në një kuptim kjo është shumë e vërtetë sepse ka akoma shumë hapësirë të pasistemuar me rregulla. Në momentin që ne hyjmë në BE, këto hapësira do të jenë më të sistemuara. Kjo ka të mirën e vetë por edhe pjesën tjetër që fitimet e shpejta bëhen më të vështira”, tha Rama, ndërsa solli në vëmendje faktin se aktualisht situata në vendet më të zhvilluara të Europës është vështirësuar dhe nuk krijon mundësime për kursime.
Kryeministri theksoi se për këdo që kërkon të investojë në Shqipëri “është hap dhe mundësi, në rast se i drejtohesh sektorit privat”.
“Më tepër akoma miniera e pashfrytëzuar këtu është fshati. Kush ka në fshat një tokë, një rrënojë në çfarëdo fshati të Shqipërisë, më i largëti i mundshëm, dhe rri andej në vend që të vijë të hapi një derë dhe të presë e përcjellë njerëz i bën llogaritë shumë gabim. Kur ti hap një derë sado larg me këtë turizëm që kemi ne do gjenden njerëzit që vijnë dhe do ta sjellin atje ty tregun”, tha Rama.
Kryeministri theksoi se është e vërtetë që nëse mendon të bësh bujqësi në disa zona është komplet e pamundur, por nëse bën turizëm është gjëja më e bukur që mund të bësh.
“Investoni sot në fshat pa pritur që të futemi në BE që të vijnë ata nga Polonia e Holanda të investojnë. Sot do të bëni një investim që do t’ju shërbejë shumë sot dhe nesër nëse e shisni do të jetë shumë më shumë”, shtoi Rama.
Burimi ATSH
