Drejtori i përgjithshëm i Burgjeve Klevis Qose gjatë vizitës së tij në Shtetet e Bashkuara të Amerikës, së bashku me homologun e tij nga Kosova, Ismail Dibrani, ishin pjesë e takimit përmbyllës në Orlando, Florida, ku me ftesë të Departamentit të Drejtësisë së Shteteve të Bashkuara të Amerikës, morën pjesë në Konferencën Vjetore të Shoqatës Korrektuese Amerikane (ACA).

Qose nëpërmjet një postimi në rrjetet sociale thekson se “ky aktivitet, një nga më prestigjiozët në fushën e sistemit korrektues, mblodhi së bashku drejtues të shërbimeve korrektuese nga Shtetet e Bashkuara dhe vende të ndryshme të botës për të shkëmbyer ide dhe përvoja mbi praktikat më të mira në këtë sektor”.

Në kuadër të konferencës, Qose bëri të ditur se zhvilluan takime të rëndësishme, përfshirë një bisedë me presidentin e sapozgjedhur të Shoqatës Ndërkombëtare të Shërbimeve Korrektuese (ACA), Ricky D. Dixon.

“Po ashtu, patëm mundësinë të bashkëbisedojmë me drejtues të tjerë të institucioneve korrektuese, duke theksuar nevojën për forcimin e bashkëpunimit ndërkombëtar”, thekson Qose.

Sipas Qoses gjatë konferencës u diskutua mbi: Sigurinë në burgje; Përmirësimin e teknologjisë; Programet rehabilituese; Përkujdesin për shëndetin mendor të të burgosurve.

“Partneriteti ynë me Ambasadën e SHBA-së mbetet një shtyllë kyçe në përpjekjet për përmirësimin dhe modernizimin në sistemin tonë penitenciar”, shkruan Qose.

Burimi ATSH