Edukimi financiar po shihet me prioritet nga Banka e Shqipërisë dhe qeveria për shtrirjen dhe përhapjen sa më të gjerë tek brezi i ri.

Ministrja e Shtetit për Rininë dhe Fëmijët, Bora Muzhaqi ndau në rrjete sociale lajmin se, në kuadër të edukimit financiar, do të nisë pilotimi në dy shkolla i një aplikacioni ku të rinjtë do të mësojnë mbi transaksionet bankare.

“Edukimi financiar dhe inovacioni ecin dorë për dore”, shkroi Muzhaqi.

Ajo tha se, “së bashku me një nga bankat e nivelit të dytë, po punojmë me ritme të shpejta për të sjellë një aplikacion inovativ për të rinjtë, ku ata do të mësojnë mbi transaksionet bankare përmes simulimeve praktike”.

Përmes këtij aplikacioni, nga menaxhimi i të ardhurave, shpenzimeve dhe kursimeve, deri tek investimet, çdo gjë do të jetë në duart e tyre.

Ministrja vuri në dukje se, pilotimi fillon së shpejti në dy shkolla të mesme, dhe të rinjtë pjesëmarrës do të fitojnë jo vetëm dije të vlefshme, por edhe shpërblime monetare.

(ATSH)