Ministrja e Shtetit për Sipërmarrjen dhe e Biznesit, Delina Ibrahimaj vuri theksin në rëndësinë e ekspertizës ndërkombëtare në zhvillimin e sipërmarrjes shqiptare drejt standardeve europiane.

E pranishme në takimin që u zhvillua në Shtëpinë e Biznesit, në Tiranë me presidentin e Eurochambres (Shoqatës së Dhomave Europiane të Tregtisë dhe Industrisë) Vladimír Dlouhý, si dhe CEO-n e saj, Ben Butters, Ibrahimaj, nënvizoi faktin që me hapat që po ndërmerr qeveria, Shqipëria është më pranë perspektivës europiane.

“Në një kohë kur Shqipëria është më pranë perspektivës europiane, ekspertiza e tyre e çmuar do të kontribuojë në zhvillimin e sipërmarrjes shqiptare duke e përgatitur për standardet e BE-së”, tha ajo.

Eurochambres përfaqëson rreth 20 milionë biznese përmes 1700 dhomave rajonale dhe lokale në Europë, ku 93% e anëtarëve janë SME, që punësojnë mbi 120 milionë njerëz.

Në takimin me përfaqësuesit e lartë ndërkombëtar merrnin pjesë edhe Eduard Shalsi kryetar i Komisionit të Ekonomisë dhe Financave dhe Ines Muçostepa kryetare e Unionit të Dhomave të Tregtisë dhe Industrisë të Shqipërisë.

(ATSH)