Në qytetin e Gramshit, i cili vitet e fundit është kthyer në atraksion për turistët vendas e të huaj, u çel sezoni turistik.

Kryeministri Edi Rama ndau në rrjetet sociale pamje nga festa e organizuar nga bashkia e Gramshit për çeljen e sezonit turistik.

“Çelet sezoni turistik në Gramsh, përmes një feste të vërtetë në natyrë, ku qindra vizitorë nga e gjitha Shqipëria janë stacionuar buzë Liqenit të Zambakëve në çadra kampingu, duke treguar se turizmi po zhvillohet edhe në ato bashki të vogla në brendësi të territorit ku më parë s’ka qenë traditë”, tha Rama.

Në Liqenin e Zambakëve, rreth 25 kilometra larg nga qyteti i Gramshit, qytetarët ndoqën koncertin e organizuar nga bashkia, si dhe shijuan gatime tradicionale të zonës.

Liqeni i Banjës bashkë me atraksione të tjera si Ujëvara e Sotirës, Liqeni i Zi, Liqeni i Dushkut, peizazhet mahnitëse të pyjeve, fshatrat e agroturizmet, e kanë kthyer Gramshin e fshehur mes maleve në një oaz të mikpritjes turistike.

Nga diga e hidrocentralit të Banjës deri në qytetin e Gramshit, ka mjaft pika çlodhjeje mes një natyre të veçantë.