Nga Pandi Laço

***

NJËSI MATËSE

Dy puthje e gjysëm larg,
Mas kohën me puthje !

Edhe largësitë maten me puthje,
Kilometrazhi shënon 160,
…puthje janë dhe ato!

Ndaloj në një bar pranë rrugës,
Me fyt të tharë,
Kamariere !
Një gllënjkë puthje, sa për të shuar etjen!

Nisem sërish drejt teje,
Akrepat e orës puthen,
Makinat e shpejta që gati puthin autostradën,
Dielli që puth horizontin,
Krahët e pemëve që përqafojnë njëra-tjetrën,
Majat e tyre që puthen,
E atje tej..
Çatitë, kryqet e kishave, minaretë,
Edhe ato rreken të puthin retë, qiellin!

Ora e qytetit,
Tabelat e distancat e qyteteve,
Polet e rruzullit,
Bankat, kurset e këmbimit, supermerkatot,
Gjithshka vendos njësinë matëse..
..të çmendurisë së pritjes time!