Promovimi i Shqipërisë për vitin e ardhshëm ka nisur që tani nga prestigjiozja e udhëtimeve “National Geographic Traveller”.

Kryeministri Edi Rama ndau në rrjetet sociale artikullin e botuar në “National Geographic Traveller”, e cila sugjeron vendin tonë në listën e 30 vendeve më interesante për të udhëtuar.

Rama tha se “jemi destinacioni “cool” për 2024”.

“Duke e renditur në vendin e parë që duhet vizituar në Evropë, revista e njohur e cilëson “si një arratisje të egër drejt yllit në ngjitje të Evropës” përvojën e të udhëtuarit në Shqipëri gjatë vitit 2024”, tha Rama.

Në artikullin e botuar nga “National Geographic Traveller” theksohet se “udhëtarët, që kërkojnë diçka më ndryshe nga aventurat e tyre të mëparshme evropiane po shikojnë gjithnjë e më shumë drejt Shqipërisë. Vendi ballkanik po tërheq një numër në rritje vizitorësh falë brigjeve të tij në Adriatik dhe Jon, të kaluarës intriguese osmane dhe komuniste dhe skenës relativisht të sapolindur të turizmit”.

“Të zhytura në brendësi të veriut, Alpet Shqiptare janë një e pjesë e rëndësishme e turizmit shqiptar. Bjeshkët e Nemuna, kjo mbretëri e majave të thepisura karstike është një ëndërr për alpinistët, ku rrëqebujt enden nëpër pyjet e bredhit dhe lulet e egra mbulojnë sipërfaqen e luginës. Ata që kërkojnë të eksplorojnë shtigjet sfiduese të rajonit mund të bëhen pjese e një turneu tetëditor, i cili ofron një itinerar që përfshin udhëtime nëpër shtigjet malore, shtëpitë tradicionale dhe një vizitë në fshatin e Thethit, duke përfshirë edhe ecje në Majat e Ballkanit. Shqipëria është gjithashtu më e aksesueshme se kurrë falë një sërë linjash të reja ajrore”, thuhet në artikull.