Shqipëria do të përfaqësohet në Kampionatin Botëror të Notit në Izrael nga katër notarë të rinj talentuar.

Pak ditë para nisjes së kampionatit botëror që do të mbahet në datat 4-9 shtator në Netanya të Izraelit, sportistët zhvilluan një takim me ministren e Arsimit dhe Sportit, Evis Kushi.

Përmes një postimi në rrjete sociale, ministrja ka ndarë disa momente nga takimi me ta.

“I përgëzova ata së bashku me trajnerin e tyre, Arian Fetishaj dhe presidentin e Federatës Shqiptare të Notit, Agim Çiraku, për arritjet e deritanishme dhe i urova shumë suksese dhe medalje në sfidën e radhës”, shkruan Kushi.

Ministrja Kushi tha se “notarët e rinj të talentuar, Julia, Kaltra, Greisi dhe Endi do të marrin pjesë në Kampionatin Botëror të Notit për të rinj që do të zhvillohet në Netanya të Izraelit në datat 4-9 shtator 2023, ku marrin pjesë mbi 600 notarë nga e gjithë bota”.