Berati po konsolidon gjithnjë e më shumë pozicionin e tij si një nga destinacionet më të rëndësishme turistike në vend, duke regjistruar shifra rekord vizitorësh edhe gjatë këtij viti.

Kryetari i bashkisë së Beratit, Ervin Ceca tha sot se “gjatë gjashtëmujorit të parë të vitit 2026, qyteti ynë ka mirëpritur rreth 550 mijë vizitorë, duke shënuar një rritje prej 22.04% krahasuar me të njëjtën periudhë të vitit 2025”.

Sipas tij, kjo rritje është dëshmi e interesit në rritje për Beratin, ku historia, kultura dhe mikpritja vazhdojnë të jenë faktorët kryesorë që tërheqin turistë nga e gjithë bota.

“Një rekord që flet qartë për rritjen e interesit ndaj Beratit, qytetit të një mbi një dritareve, ku historia, mikpritja dhe investimet e vazhdueshme po e bëjnë çdo vit e më tërheqës për vizitorët nga e gjithë bota,” thekson Ceca në një postim në rrjetet sociale.

Ceca u shpreh se “2026-a po thyen rekordet e 2025-ës dhe Berati vazhdon të konfirmohet si një nga destinacionet më të preferuara turistike në Shqipëri”.

Fluksi i lartë i turistëve është reflektuar si në zonën historike të Mangalemit dhe Kalasë së Beratit, ashtu edhe në qendrën muzeore dhe pikat e tjera të trashëgimisë kulturore, të cilat mbeten ndër më të vizituarat gjatë gjithë vitit.

Trendi pozitiv pritet të vijojë edhe në muajt në vijim, duke e konfirmuar Beratin si një nga destinacionet më të preferuara turistike në Shqipëri dhe një pikë të rëndësishme të turizmit kulturor në rajon.

Burimi ATSH