Kryetari i Kuvendit, Niko Peleshi, ka uruar Shtetet e Bashkuara të Amerikës me rastin e Ditës së Pavarësisë, duke vlerësuar marrëdhëniet e ngushta mes dy vendeve dhe mbështetjen e vazhdueshme amerikane për Shqipërinë.

Peleshi e cilësoi këtë përvjetor si një moment historik për një vend mik dhe aleat strategjik të Shqipërisë.

“Gëzuar Ditën e Pavarësisë, Shteteve të Bashkuara të Amerikës! Një moment historik për një komb mik dhe aleat të çmuar. Mirënjohje për miqësinë e fortë, partneritetin e besueshëm dhe mbështetjen e palëkundur që ka shoqëruar Shqipërinë ndër vite. Një aleancë e ndërtuar mbi besimin, respektin dhe vlerat e përbashkëta mbetet garanci për një të ardhme edhe më të fortë. Happy Independence Day!”, shkruan Peleshi.

Në mesazhin e tij, kreu i Kuvendit nënvizon rëndësinë e partneritetit strategjik mes Shqipërisë dhe SHBA-së, duke e cilësuar atë si një aleancë të bazuar në besim, respekt të ndërsjellë dhe vlera të përbashkëta.

Ky është përvjetori i 250-të i Ditës së Pavarësisë së SHBA. Deklarata e Pavarësisë së Shteteve të Bashkuara të Amerikës u nënshkrua në 4 korrik të vitit 1776, kur 13 koloni të Amerikës së Veriut shpallën pavarësinë nga Mbretëria e Bashkuar.

Deklarata e Pavarësisë mbetet si referencë e demokracisë solide, e shtetit të së drejtës dhe të drejtave dhe lirive të individit.

Marrë nga ATSH