Ditën e djeshme, në ambientet e “MAK Hotel Tirana”, Komuniteti Mysliman i Shqipërisë, shtroi iftarin e parë, ku morën pjesë: Presidenti i Republikës së Shqipërisë, Sh.T.Z. Bajram Begaj, kryetarë të komuniteteve fetare të vendit, ministra, deputetë, personalitete publike, ambasadorë, gazetarë, zyrtarë qendror e lokal, myftinj, imamë si dhe besimtarë të shumtë.

Në fjalën e tij të rastit, Kryetari i Komunitetit Mysliman të Shqipërisë, H. Bujar Spahiu, pasi falenderoi të pranishmit për pjesëmarrjen dhe ju uroi agjërim të lehtë e të pranuar tek Allahu (xh.sh) të gjithë besimtarëve, theksoi se Ramazani nuk është vetëm një praktikë personale adhurimi, por një projekt etik dhe moral që synon formësimin e karakterit, forcimin e ndërgjegjes dhe ripërtëritjen shpirtërore e atë sociale.

Në përmbyllje, ai bëri thirrje për drejtësi, dialog, solidaritet dhe vendimmarrje të bazuar në parime, duke uruar që Ramazani të shërbejë si kohë reflektimi dhe bekimi për vendin dhe shoqërinë tonë.

Të pranishmit i përshëndeti gjithashtu edhe Presidenti i Republikës së Shqipërisë, z. Begaj, i cili u shpreh se me nisjen e iftarit të parë troket në vatrat tona një muaj i begatë, i cili për çdo besimtar mysliman shënon një rrugëtim të ri shpirtëror.

Më tej, të pranishmit konsumuan iftarin e parë të këtij muaji të bekuar.

Komuniteti Mysliman i Shqipërisë, uron të gjithë besimtarët Gëzuar Muajin e Bekuar të Ramazanit!