Policia Kufitare e Vlorës, në bashkëpunim me qytetarët, i erdhi në ndihmë sot një shtetaseje që rrezikoi të mbytej në Gjirin e Shën Janit.

Gjatë patrullimit me mjet lundrues, shërbimet e Policisë Kufitare dëgjuan thirrjet për ndihmë të pushuesve. Shtetasja ishte nxjerrë në breg nga qytetarët, pasi kishte pirë ujë gjatë notimit dhe kishte rrezikuar mbytjen.

Punonjësit e Policisë, së bashku me pushuesit, i dhanë ndihmën e parë dhe më pas e transportuan me mjetin lundrues drejt portit të Vlorës. Gjatë rrugës, gjendja e saj shëndetësore u përkeqësua, por falë ndërhyrjes së policisë u bë e mundur stabilizimi i saj deri në dorëzimin tek ekipi i urgjencës mjekësore.

Sipas policisë, shtetasja ndodhet jashtë rrezikut për jetën, nën kujdesin e mjekëve të Spitalit Rajonal Vlorë.

Policia e Shtetit falënderon qytetarët për bashkëpunimin dhe apelon për kujdes maksimal gjatë pushimeve verore.