
Hoxha pret ambasadorët e rinj të Brazilit, Danimarkës dhe Izraelit, në fokus bashkëpunimi dypalësh
Ministri për Evropën dhe Punët e Jashtme, Ferit Hoxha zhvilloi sot takime me ambasadorët e rinj të Brazilit, Danimarkës dhe Izraelit në vendin tonë, me fokus forcimin e dialogut politik dhe zgjerimin e bashkëpunimit dypalësh.

Ministri për Evropën dhe Punët e Jashtme, Ferit Hoxha zhvilloi sot takime me ambasadorët e rinj të Brazilit, Danimarkës dhe Izraelit në vendin tonë, me fokus forcimin e dialogut politik dhe zgjerimin e bashkëpunimit dypalësh.
Në takimin me ambasadorin e Brazilit, Fabio Vaz Pitaluga, diskutimet u përqendruan në intensifikimin e dialogut politik dhe zgjerimin e bashkëpunimit në fushat e tregtisë, investimeve, turizmit, mbrojtjes dhe teknologjisë.
Me ambasadoren e Danimarkës, Louise Elisabeth Rigtrup Holmsgaard, ministri Hoxha përshëndeti rihapjen e Ambasadës daneze në Tiranë, duke e cilësuar atë si një dëshmi të angazhimit për forcimin e partneritetit mes dy vendeve.
Në këtë takim u diskutua për bashkëpunimin në energjinë e rinovueshme, inovacionin digjital dhe turizmin e qëndrueshëm, si dhe për mbështetjen daneze ndaj anëtarësimit të Shqipërisë në Bashkimin Evropian dhe bashkëpunimin në kuadër të NATO-s.
Ndërsa në takimin me ambasadorin e Izraelit, Ohad Nakash Kaynar, vëmendja u përqendrua në forcimin e marrëdhënieve miqësore dhe zbatimin konkret të Marrëveshjes së Bashkëpunimit, të nënshkruar muajin e kaluar.
Ministri Hoxha u uroi tre ambasadorëve suksese në misionet e tyre diplomatike, duke riafirmuar gatishmërinë e Shqipërisë për të thelluar bashkëpunimin dhe për të konkretizuar partneritetet dypalëshe.
Burimi ATSH


















