Ministria e Infrastrukturës dhe Energjisë ka rihapur procedurën për koncesionin e projektimit, ndërtimit, operimit, mirëmbajtjes, rehabilitimit dhe transferimit të segmentit rrugor “Milot-Balldre”.

Kontrata do të ketë një kohëzgjatje prej 35 vjetësh dhe vlera totale e parashikuar është 364,7 milionë euro.

Në mesin e muajit korrik, MIE anulloi procedurën e mëparshme të koncesionit për ndërtimin e këtij segmenti rrugor, pasi asnjë nga ofertat e paraqitura nuk përmbushi kërkesat e procedurës konkurruese.

Sipas njoftimit të publikuar në Agjencinë e Prokurimit Publik, nuk është dorëzuar asnjë ofertë e përshtatshme për këtë projekt.

Gjurma e propozuar e rrugës “Milot-Balldre” fillon në nyjen e Milotit, ku do të lidhet me segmentet rrugore Milot-Thumanë-Kashar-Lekaj dhe me Rrugën e Kombit, dhe do të përfundojë në rrugën ekzistuese Tiranë-Shkodër, në Balldre.

Autostrada e re Milot-Balldre parashikohet të jetë një autostradë e kategorisë A, që përfaqëson standardin më të lartë të rrugëve europiane.

Ajo do të ketë gjatësi prej 17 kilometrash dhe do të jetë tërësisht e mbyllur në të dy krahët. Gjerësia e rrugës do të jetë me tre korsi në secilin drejtim, duke mundësuar lëvizjen me një shpejtësi maksimale prej 120 km/orë.

Afati për dorëzimin e ofertave është data 2 tetor 2025, ora 12:00.

Ky projekt synon të përmirësojë lidhjet rrugore në këtë zonë strategjike, duke kontribuar në zhvillimin e infrastrukturës dhe përmirësimin e ndërlidhjes në vend.

Burimi ATSH