Kryeministri Edi Rama vizitoi dje Spitalin Veterinar i cili hapi dyert në kryeqytet si spitali më i madh për kafshët në rajon.

Rama e cilësoi këtë spital si “një kryevepër humanizmi, sipërmarrjeje rinore dhe arkitekture”.

“Vet Hospital”, spitali i parë veterinar në vend dhe ndër më të mëdhenjtë e më të mirët në Europë për kujdesin ndaj kafshëve, është i pajisur me protokollet dhe aparaturat më bashkëkohore, duke përfshirë radiografi digjitale, sallë operacioni, shërbim urgjence 24/7, stomatologji, reanimacion, dhe të gjitha shërbimet e nevojshme për të garantuar trajtimin më të mirë shëndetësor për kafshët.

Kreu i qeverisë theksoi se, ky spital është një realitet frymëzues i ndërtuar nga katër mjekë të rinj veterinerë Emre Aslan, Erko Prifti, Martin Llazani, Marvin Brahja.

“Ky realitet është aq mbresëlënës sa ia vlen të vizitohet edhe si një muze i gjallë i kujdesit për kafshët”, nënvizoi Rama.

Me një ekip profesionistësh të përkushtuar dhe kujdes 24/7, Vet Hospital Tirana është tashmë një strehë e sigurisë dhe shërbimit cilësor për kafshët shtëpiake, duke ofruar trajtim të specializuar dhe një mjedis miqësor me kafshët.

Spitali ofron një gamë të gjerë shërbimesh dhe ka në përdorim pajisje dhe teknologji të avancuara për diagnostikimin e shëndetit të kafshëve, ndërsa angazhon edhe profesionistë të huaj për ekspertizë më bashkëkohore në këtë fushë.