Policia Kufitare e Vlorës dhe Roja Bregdetare ndihmuan sot dy shtetas të huaj që udhëtonin me një velierë, e cila kishte pësuar defekt në motor dhe kishte mbetur në det të hapur, përballë Gjirit të Gramës.

Sipas njoftimit zyrtar nga Drejtoria Vendore për Kufirin dhe Migracionin (DVKM) Vlorë, ngjarja është regjistruar gjatë ditës së sotme, kur është marrë sinjal emergjence nga mjeti lundrues, i cili ndodhej rreth 5 milje larg bregut.

Dy shtetasit e huaj kishin mbetur të bllokuar për shkak të defektit teknik dhe kushteve të vështira të detit.

Pas marrjes së njoftimit është organizuar ndërhyrja nga Stacioni i Policisë Kufitare Dhërmi, ndërsa njëkohësisht një patrullë tokësore ka vëzhguar nga bregu lëvizjet e velierës.

Pas disa orësh operacion dhe në bashkëpunim me ekuipazhin e Rojës Bregdetare, është bërë e mundur tërheqja e sigurt e velierës në gjirin e Porto Palermos.

Policia informoi se dy shtetasit e huaj ndodhen në gjendje të mirë shëndetësore dhe nuk kanë pësuar lëndime.

Policia Kufitare siguron se do të vijojë të mbetet në gatishmëri të plotë për të garantuar sigurinë në hapësirat detare dhe për t’iu përgjigjur në kohë çdo situatë emergjente që mund të paraqitet, në shërbim të qytetarëve dhe turistëve.