Kryeministri Edi Rama deklaroi sot se brenda vitit synojmë të hapim të gjithë kapitujt e negociatave me Bashkimin Evropian, ndërsa plani i përbashkët me Komisionin Evropian është mbyllja e negociatave në vitin 2027.

Në një konferencë të përbashkët për shtyp në Tiranë me presidentin e Këshillit Evropian, António Costa, kryeministri Rama vlerësoi se procesi i integrimit në Bashkimin Evropian po ecën shumë mirë.

“Presidenti i Këshillit Evropian është përsëri në Tiranë dhe sigurisht që kjo është një kënaqësi e veçantë për ne. Natyrisht dhe personalisht është kënaqësi që të ritakohem me Presidentin, i cili është një mik i dashur edhe shumë i mençur”, tha Rama.

Kryeministri nënvizoi se vizita e presidentit të Këshillit Europian në Tiranë vjen pas turit të tij rajonal. “Është ndalur në Tiranë dhe për faktin se nesër do të jetë i pranishëm në takimin në samitin e Komunitetit Politik Evropian”, tha Rama.

Rama bëri të ditur se temë e takimit ishin të dyja aspektet që e lidhin Shqipërinë me Këshillin Evropian dhe Bashkimin Evropian.

Lidhur me rrugën e Shqipërisë drejt anëtarësimit në BE, Rama shprehu bindjen se procesi po ecën shumë mirë.

“Sot Shqipëria është zyrtarisht në tryezën e negociatave me 16 kapituj të hapur, 8 kapituj të tjerë do të hapen në ditët në vijim dhe synojmë t’i hapim të tërë kapitujt brenda vitit. Plani i përbashkët me Komisionin Evropian dhe i mbështetur nga vendet anëtare është që të arrijmë të mbyllim negociatat në harkun e 3 viteve, pra, nga 2024 kur nisi procesi në vitin 2027”, tha Rama.

Kryeministri e cilësoi këtë plan shumë ambicioz, ndërsa theksoi se është një mundësi e jashtëzakonshme për ne, pasi “janë rreshtuar të gjitha yjet” dhe BE sot, si asnjëherë më parë, është shumë i dëshiruar të pranojë anëtarë të rinj, natyrisht bazuar në meritë dhe rezultate”.

Në aspektin rajonal, Rama u ndal tek ecuria e rajonit e lidhur kjo me arsyet pse BE sot është në gatishmërinë më të lartë për të pranuar anëtarë të tjerë, sepse edhe konteksti gjeopolitik është i tillë.

“Dëshiroj të përfitoj nga rasti që t’i ftoj të gjithë kolegët e rajonit, miqtë e mi, që të mos e humbasin këtë moment që historia na e ka sjellë në derë dhe ta shfrytëzojnë maksimalisht këtë gatishmëri të BE-së, pa harruar se historia e gjithë këtyre viteve ka treguar se procesi i zgjerimit mund të shpejtohet në një moment dhe mund të ngadalësohet me shumë vite”, shtoi Rama.

Burimi ATSH