Kryeministri Edi Rama, njëherësh kryetar i Partisë Socialiste kërkoi sot që në 11 maj, në të gjitha kutitë e votimit në Krujë të dalë rezultati më i mirë ndonjëherë për PS-në.

Në një takim përmbyllës elektoral në Fushë-Krujë, Rama prezantoi arritjet kyçe për sektorët më të rëndësishëm dhe sfidat e Shqipërisë 2030 në BE.

Kryeministri theksoi se “kemi bërë gjithçka kemi mundur dhe nuk kemi lënë pa bërë asnjë gjë të mundur për të ngritur në një nivel tjetër Durrësin, Krujën dhe gjithë Shqipërinë”.

Rama premtoi se në 4 vitet e ardhshme PS do të bëjë edhe më shumë se sa ka bërë në të gjitha vitet e tjera të mbledhura së bashku, nëse gjithë qytetarët do t’i japin një mbështetje edhe më të fortë.

“Na duhet një besim i palëkundur dhe një fuqi edhe më të madhe për të marrë vendime dhe për ta çuar para vendin duke realizuar edhe profecinë e atij që ju e keni në Krujë si hijen e gjithë malit, Gjergj Kastriotit, i cili e përcaktoi qysh atëherë se fati i stërnipërve të tij është Europa”, shtoi Rama.

Burimi ATSH