Në panairin ndërkombëtar të turizmit ITB Berlin, vijojnë panelet e diskutimit në stendën e Shqipërisë. Një ndër panelet ishte ai i turizmit të aventurës, organizuar nga stafi i Ministrisë së Turizmit dhe Mjedisit me bashkëpunëtorët e GIZ Albania.

Në një postim të sajin në rrjetet sociale, ministrja e Turizmit dhe Mjedisit, Mirela Kumbaro, shkruan se, turizmi i aventurës në Shqipëri po arrin lartësi të reja.

“Nga ngjitjet dhe ecjet në mal tek çiklizmi, turet e skive dhe kayaking, paneli i drejtuar nga gazetari amerikan Alex Crevar solli në qendër të vëmendjes paketat e turizmit të qëndrueshëm për aventurierët”, shkroi ministrja Kumbaro.

Turimi i aventurës ka marrë vëmendje të veçantë vitet e fundit. Kryeministri Rama e ka cilësuar më herët si një mundësi të artë zhvillimi për zonat rurale, pasi mijëra vizitorë, kryesisht të huaj, zgjedhin shtigjet shqiptare për të eksploruar natyrën.

Vendi ynë ofron jo vetëm plazh dhe mal, por edhe shumë mundësi mes të cilave edhe turizmin e aventurës, rafting, ngjitje malore, gara me makina off road e shumë aktivitete të tjera.

Burimi ATSH