Drejtoria e Përgjithshme e Burgjeve ka lidhur një marrëveshje bashkëpunimi me qendrën psiko-sociale “Vatra” në Vlorë, e cila operon në disa qytete.

Drejtori i Përgjithshëm i Burgjeve Klevis Qose, thekson se marrëveshja synon riaftësimin dhe riintegrimin e të paraburgosurve dhe të dënuarve.

Marrëveshja u nënshkrua me Brikena Pukën, drejtoreshën ekzekutive të Qendrës “Vatra”.

“Bashkëpunimi synon riaftësimin dhe riintegrimin e të paraburgosurve dhe të dënuarve, që janë të përfshirë në krime që lidhen me dhunën në familje, dhunën me bazë gjinore dhe abuzimin seksual”, shkruan Qose në rrjetet sociale.

Sipas Qoses, qendra “Vatra” do të ofrojë shërbime të rregullta në IEVP Vlorë, Fier, Elbasan dhe Lushnjë dhe do të jetë gjithashtu pjesë e rrjetit të referimit për të burgosurit pas lirimit.

Burimi ATSH