Në Censin e vitit 2023, rezultatet përfundimtare të të cilit u publikuan dje, 91% e popullsisë deklaruan etnicitet shqiptar, ndërsa 2,8% deklaruan një lloj tjetër etniciteti dhe 0,6% u përgjigjën me “preferoj të mos përgjigjem”.

Një përqindje e vogël e popullsisë (0,05%) ka deklaruar “asnjë” për etnicitet.

Për pjesën e mbetur prej 5,6% të popullsisë, të dhëna mbi etnicitetin nuk janë të disponueshme, pasi pyetja nuk mund t’u bëhej anëtarëve të familjes.

Përqindja e popullsisë që deklaroi “shqiptar/e” për pyetjen mbi gjuhën e zakonshme të folur në shtëpi ishte e njëjtë me përqindjen që deklaroi etnicitet shqiptar: 91,1%.

Rreth 66,9% e popullsisë deklaroi se ndjek ose i përket një feje ose besimi specifik sipas kategorive të paracaktuar në Cens.

Një përqindje e konsiderueshme prej 13,8% deklaroi se janë besimtarë, por nuk i përkasin ndonjë feje ose besimi të caktuar, ndërsa 3,6% deklaruan se janë “ateistë”, dhe 10,2% deklaruan “preferoj të mos përgjigjem” për pyetjen mbi fenë.

Ashtu si me pyetjen mbi etnicitetin, edhe për besimin, për 5,6% të popullsisë të dhënat nuk janë të disponueshme.

(ATSH)