Ministri i Drejtësisë, Ulsi Manja deklaroi sot se, kushdo që ka kryer krim ndërkombëtar nuk do të ketë imunitet penal.

Në fjalën e tij në Kuvend për pr/ligjin për ratifikimin e Konventës Lubjanë – Hagë për Bashkëpunimin Ndërkombëtar për Hetimin dhe Ndjekjen Penale të Krimit të Gjenocidit, Krimeve kundër Njerëzimit, Krimeve të Luftës dhe Krimeve të Tjera Ndërkombëtare”, Manja u shpreh se, “qëllimi i kësaj Konvente është të plotësojë sistemin juridik ndërkombëtar me parashikime të detajuara dhe aktuale për ndihmën e ndërsjellët juridike, ekstradimin, hetimin dhe ndjekjen penale të krimeve kryesore ndërkombëtare”.

“Konventa do të përfshijë ndihmën e ndërsjellët juridike dhe ekstradimin për ndjekjen penale në çdo rast të krimeve të gjenocidit, krimeve kundër njerëzimit dhe krimeve të luftës”, tha Manja.

“Kjo Konventë plotëson çështjet e juridiksionit dhe mbrojtjen e viktimave, duke qenë një instrument kyç për të përmirësuar efektivitetin e hetimit dhe ndjekjes penale në nivel kombëtar”, theksoi Manja.

Po ashtu, shtoi ministri Manja, “kjo Konventë është edhe një instrument ligjor ndërkombëtar për të mbrojtur dhe mbështetur të drejtat e të mbijetuarve”.

Manja vlerësoi se, “ratifikimi i kësaj Konvente bëhet i domosdoshëm në luftën kundër pandëshkueshmërisë së këtyre krimeve, duke siguruar që kushdo që ka kryer krim ndërkombëtar nuk do të ketë imunitet penal”.