Ministri për Evropën dhe Punët e Jashtme, Ferit Hoxha, zhvilloi një takim në Forumin Strategjik të Bledit, me homologun e tij malazez, zëvendëskryeministrin dhe ministrin e Punëve të Jashtme të Malit të Zi, Ervin Ibrahimović.

Përmes një postimi në rrjetet sociale, Hoxha theksoi marrëdhëniet miqësore mes Shqipërisë dhe Malit të Zi, duke nënvizuar bashkëpunimin mes dy vendeve si fqinjë, partnerë dhe aleatë në NATO.

“Siç thonë, ndonjëherë një fotografi flet më shumë se një mijë fjalë. Pas takimit me homologun dhe mikun tim, Zëvendëskryeministrin dhe Ministrin e Punëve të Jashtme të Malit të Zi, Ervin Ibrahimović, mund të them pa asnjë fije dyshimi: “Gjithçka qetë në këtë anë të frontit të Ballkanit Perëndimor””, shkroi Hoxha.

Hoxha tha se gjatë takimit u konfirmua marrëdhënia e qëndrueshme dhe miqësore mes dy vendeve, ndërsa theksoi se Shqipëria dhe Mali i Zi janë në krye të rrugës drejt anëtarësimit në Bashkimin Evropian.

“Ne konfirmuam atë që dihet tashmë dhe që ka qenë gjithmonë prezente: marrëdhënien e shëndetshme dhe miqësore midis dy vendeve tona, si fqinjë të mirë, partnerë të besuar, aleatë të NATO-s dhe në krye të rrugës drejt anëtarësimit në BE”, tha ai.

Ai nënvizoi gjithashtu rëndësinë e bashkëpunimit rajonal, sigurisë dhe stabilitetit, si dhe forcimit të lidhjeve dhe kontakteve mes qytetarëve të vendeve të rajonit.

“Shqipëria ka investuar dhe do të vazhdojë të investojë në bashkëpunimin rajonal, sigurinë dhe stabilitetin, lidhshmërinë dhe kontaktet midis njerëzve, sepse kështu ndërtojmë besim, i afrojmë shoqëritë tona dhe krijojmë një të ardhme të përbashkët evropiane për të gjithë”, tha Hoxha.

Burimi ATSH