Zëvendësministri i Bujqësisë dhe Zhvillimit Rural, Enio Civici mori pjesë në ceremoninë e hapjes së Panairit Ndërkombëtar të Bujqësisë “Agrotech Expo 2023”, që mbahet në Tiranë nga data 18 deri më 20 tetor.

Panairi ka bërë bashkë sipërmarrës që operojnë në sektorë të ndryshëm të bujqësisë dhe prezantojnë në këtë aktivitet një larmishmëri produktesh bujqësore, që nga ushqimi organik dhe agroturizmi, deri tek ambalazhimi dhe inovacioni në makineritë bujqësore.

Zv/ministri Civici vlerësoi cilësinë e produkteve që prezantohen në këtë panair si të njëjtë me atë të produkteve ndërkombëtare.

“Kjo vjen si sukses i politikave të qeverisë shqiptare në mbështetje të fermerit dhe përfshirja e teknologjisë dhe inovacionit në sektor, faktorë të cilët kanë ndihmuar në rritjen e cilësisë së prodhimeve dhe konkurrueshmërisë në tregjet e eksportit”, u shpreh Civici.

Fokusi i këtij panairi është të bëjë bashkë sipërmarrësit e agrobiznesit në Shqipëri me kompanitë e huaja nga vende si Kosova, Greqia, Spanja, Serbia, Holanda dhe Gjermania, të cilët janë të pranishëm në panair gjatë 3 ditëve.

Gjatë panairit pritet të zhvillohet dhe konferenca e vajit të ullirit, pasi është konstatuar potenciali i madh që ka ky sektor, për shkak të kërkesës së lartë. Kjo do të ndihmojë në rritjen e të ardhurave të fermerëve.

Ndërkohë tjetër faktor kryesor për zhvillimin e sektorit është edhe prezantimi i teknologjive të reja, përdorimi i të cilave sjellin efikasitet në prodhim.

Marrë nga ATSH