Tirana do të jetë mikpritëse e edicionit të 11-të të “Golden Age Gym Festival”, që do të zhvillohet nga 1 deri më 7 tetor 2028, me pjesëmarrjen e mbi dy mijë personave nga e gjithë Europa.

Lajmi u bë i ditur nga Komiteti Olimpik Kombëtar Shqiptar (KOKSH), sipas të cilit, përzgjedhja e Tiranës u miratua unanimisht nga Bordi Ekzekutiv, duke vlerësuar kandidaturën shqiptare dhe kapacitetet organizative të vendit.

Sipas KOKSH-it, organizimi i festivalit vjen falë iniciativës së Federatës Shqiptare të Gjimnastikës dhe mbështetjes së Komitetit Olimpik Kombëtar Shqiptar.

Presidenti i KOKSH-it, Fidel Ylli prezantoi vizionin për organizimin e aktivitetit dhe potencialin e Shqipërisë për të pritur një ngjarje të kësaj përmase. Në prezantim u evidentuan bukuritë natyrore, mikpritja shqiptare, infrastruktura dhe lehtësitë për pjesëmarrësit, të shoqëruara edhe me një video promovuese për Shqipërinë.

“Golden Age Gym Festival 2028” synon të shërbejë jo vetëm si një aktivitet sportiv, por edhe si një mundësi për promovimin ndërkombëtar të Shqipërisë, kulturës dhe traditave të saj, si dhe për forcimin e lidhjeve mes njerëzve përmes sportit.

Marrë nga ATSH