Mbrëmjen e sotme, pak para mesnatës mbërriti në aeroportin e Rinasit në Tiranë grupi i dytë me 95 afganë, të cilët u arratisën nga atdheu nga frika e hakmarrjes së talebanëve.

Avioni me afganët, mes tyre gra dhe dy fëmijë u ul në pistë rreth orës 23:00, ndërsa pak pas mesnate pritet që të vijë edhe grupi i tretë. Pasagjerët u pritën nga Ministrja për Evropën dhe Punët e Jashtme, Olta Xhaçka dhe ambasadorja amerikane në Shqipëri, Yuri Kim.

Mbrëmë pas mesnate në Shqipëri erdhën 121 afganë të cilët janë vendosur në struktura hoteliere mes Durrësit dhe Tiranës.

Këtë të premte ata u vizituan nga kryeministri Edi Rama i cili tha dikur se edhe shqiptarët kanë qenë në pozitën e tyre ndërsa shpërndau disa dhurata për fëmijët afganë.

Në total deri tani kanë ardhur 216 qytetarë afganë. Shqipëria do të strehojë përkohësisht 4000 afganë deri sa të marrin vizën për të udhëtuar në Shtetet e Bashkuara të Amerikës.