Kryebashkiaku i Korçës, Sotiraq Filo përcolli në rrjetet sociale, pamje nga Poli i Dijes, kampusi i ri që do të ofrojë auditorë, laboratorë dhe bibliotekë, duke i dhënë studentëve mundësinë të bashkojnë teorinë me praktikën dhe të zhvillojnë kreativitetin e tyre.

Filo bëri të ditur se punimet për Polin e Dijes përfunduan dhe se ky investim i rëndësishëm i shtohet infrastrukturës arsimore të Korçës dhe që hap një kapitull të ri për arsimin dhe të rinjtë.

“Ky kampus modern është një hapësirë ku dija, praktika dhe inovacioni bashkohen për të krijuar më shumë mundësi formimi për të rinjtë. Me auditorë, laboratorë dhe bibliotekë të pajisur sipas standardeve bashkëkohore, Poli i Dijes ofron kushte të shkëlqyera për formimin akademik dhe profesional”, u shpreh Sotiraq Filo.

Arsimi konsiderohet si një nga shtyllat më të rëndësishme të zhvillimit afatgjatë të Korçës dhe investime të tilla janë investime të drejtpërdrejta në të ardhmen e qytetit. Përmes këtij projekti, Korça forcon më tej identitetin e saj si qytet i dijes, arsimit dhe mundësive për të rinjtë.

Burimi ATSH