Qindra vizitorë vendas e të huaj po zgjedhin të ndalen në zemër të Elbasanit, aty ku historia, kultura dhe tradita ruhen në çdo gur.

Kalaja e Elbasanit është kthyer në një nga pikat më tërheqëse për turistët, të cilët shëtisin nëpër rrugicat e saj, fotografojnë çdo detaj dhe zbulojnë nga afër një pjesë të historisë së qytetit.

Sapo kalon portën e Kalasë, duket sikur lë pas zhurmën e qytetit dhe hyn në një tjetër kohë. Rrugicat me kalldrëm të çojnë mes historisë, ndërsa muret e lashta, shtëpitë karakteristike dhe gjurmët e qytetërimeve ndër shekuj i japin çdo hapi një tjetër kuptim.

Kishat, xhamitë, shtëpitë karakteristike, dyqanet e vogla të suvenireve, lokalet dhe rrugicat plot jetë krijojnë një mozaik të veçantë, ku e kaluara bashkëjeton natyrshëm me të sotmen. Për turistët, kjo hapësirë nuk është vetëm një monument historik, por një vend ku mund të përjetojnë nga afër mënyrën e jetesës, mikpritjen dhe traditat e qytetit.

Vizitorët ndalen shpesh pranë mureve të kalasë për të fotografuar arkitekturën, ndërsa të tjerë zgjedhin të humbasin në rrugicat e saj, duke zbuluar hap pas hapi elementë të historisë dhe jetës së përditshme të Elbasanit.

Për shumë prej turistëve, ndalesa në Elbasan nuk është thjesht një vizitë kalimtare.

Jonathan, një turist nga Anglia, tregon se pas vizitës në Kala ka vendosur të qëndrojë edhe një ditë në Elbasan, për të zbuluar më shumë nga qyteti dhe atmosfera e tij.

“Është një qytet shumë interesant dhe ndihet shumë ndryshe nga vendet e tjera që kemi vizituar në Shqipëri”, shprehet ai.

Pikërisht kjo përvojë po i shtyn gjithnjë e më shumë vizitorë që, përtej destinacioneve të njohura turistike, të zbulojnë edhe qytetet me histori dhe identitet të veçantë.

Elbasani, me kalanë në qendër të tij, ofron një udhëtim ku trashëgimia kulturore, arkitektura dhe jeta e përditshme ndërthuren në mënyrë të natyrshme.

Dhe ndoshta kjo është një nga magjitë e Elbasanit: të vish për një ndalesë, të hysh nëpër portat e Kalasë dhe të dëshirosh të qëndrosh pak më gjatë, për të zbuluar edhe më shumë nga qyteti që ruan në çdo rrugicë një copëz historie.

Burimi ATSH