Zëvendëskryeministrja Albana Koçiu, ndau sot historinë e Fatrinës dhe Klaudios, dy të rinjve që e nisën rrugëtimin e tyre profesional përmes Programit të Praktikave të Punës dhe sot janë pjesë e stafit të Qendrës së Parandalimit të Krimeve të të Miturve dhe të Rinjve, në varësi të Ministrisë së Drejtësisë.

Në një video të publikuar në rrjetet sociale, Koçiu thekson se programi ka krijuar mundësi konkrete punësimi për të rinjtë. Sipas saj, 1600 të rinj janë punësuar ndër vite përmes këtij programi, duke e kthyer eksperiencën e fituar gjatë praktikës në një mundësi reale për punësim.

“Nga praktika drejt punësimit. Fatrina dhe Klaudio janë dy prej të rinjve që e nisën rrugëtimin profesional përmes Programit të Praktikave të Punës dhe sot janë pjesë e stafit të Qendrës së Parandalimit të Krimeve të të Miturve dhe të Rinjve. Përmes Programit të Praktikave të Punës, 1600 të rinj janë punësuar ndër vite, duke e kthyer eksperiencën e fituar në një mundësi konkrete punësimi”, shkruan ajo.

Sipas saj, qeveria shqiptare do të vijojë të investojë te të rinjtë dhe te mundësitë që u japin atyre më shumë eksperiencë dhe më shumë hapësira për të ndërtuar të ardhmen e tyre.

Në videon e publikuar nga Koçiu, Fatrina tregon se praktika i ka dhënë mundësinë të zhvillohet profesionalisht dhe të krijojë një eksperiencë të re, ndërsa Klaudio vlerëson rritjen profesionale dhe mbështetjen e stafit.

Dy të rinjtë u bëjnë thirrje bashkëmoshatarëve që të aplikojnë dhe të shfrytëzojnë mundësitë që ofron programi.

Marrë nga ATSH