Policia e Shtetit ka bërë thirrje për vigjilencë ndaj rasteve të mashtrimeve online, pasi ditët e fundit janë konstatuar mesazhe të dyshimta të dërguara përmes SMS-ve dhe aplikacioneve të komunikimit, përfshirë WhatsApp-in.

Sipas Policisë së Shtetit, autorët e këtyre skemave paraqiten në mënyrë të rreme si përfaqësues të institucioneve bankare dhe u kërkojnë qytetarëve të përditësojnë të dhënat bankare, të verifikojnë llogarinë ose të kryejnë veprime të tjera duke klikuar në një link të përfshirë në mesazh.

Policia sqaron se bëhet fjalë për skema mashtrimi të tipit “phishing”, të cilat synojnë vjedhjen e kredencialeve të e-banking, kodeve të verifikimit OTP, PIN-it dhe të dhënave të kartave bankare. Këto të dhëna mund të përdoren më pas për kryerjen e transaksioneve të paautorizuara dhe shkaktimin e dëmeve financiare.

Për të shmangur rënien pre e këtyre skemave, Policia e Shtetit u kërkon qytetarëve të mos klikojnë në linke të dërguara përmes SMS-ve, WhatsApp-it apo aplikacioneve të tjera të komunikimit, veçanërisht kur mesazhet vijnë nga numra të panjohur ose të dyshimtë.

Gjithashtu, qytetarët këshillohen të mos japin në asnjë rrethanë fjalëkalimet, kodet OTP, PIN-in apo të dhënat e kartës bankare.

Policia rekomandon që, përpara identifikimit në shërbimet bankare online, qytetarët të kontrollojnë me kujdes adresën e faqes së internetit dhe të sigurohen se po përdorin kanalet zyrtare të bankës.

Në rast paqartësie, qytetarët duhet të kontaktojnë bankën vetëm përmes numrave të telefonit dhe kanaleve zyrtare të komunikimit.

Nëse një qytetar ka klikuar në një link të dyshimtë ose ka dhënë të dhënat e tij bankare, Policia këshillon që të kontaktohet menjëherë banka, për bllokimin e kartës ose llogarisë dhe marrjen e masave të nevojshme. Gjithashtu, duhet të ndryshohen menjëherë fjalëkalimet e aksesit në shërbimet bankare dhe rasti të raportohet pranë Policisë së Shtetit, Drejtorisë për Hetimin e Krimeve Kibernetike ose çdo drejtorie vendore të Policisë.

Policia e Shtetit apelon për kujdes të shtuar ndaj çdo mesazhi, linku apo faqeje interneti që kërkon të dhëna personale, bankare ose kode verifikimi.

“Mos klikoni. Mos jepni të dhëna. Verifikoni gjithmonë përmes kanaleve zyrtare”, apelon Policia.

Marrë nga ATSH