Romani “Valsi i lumturisë” (“Un sogno italiano”) i shkrimtarit Ylljet Aliçka ka fituar Çmimin e parë Ndërkombëtar, “Letteratura dal fronte“, në edicionin e 23-të të tij.

Ky çmim është themeluar nga qyteti martir i Cassinos, në Itali, dhe i dedikohet asaj letërsie europiane që “dëshmon krizën njerëzore për ndërtimin e paqes”.

Në shortlistën e këtij viti, dedikuar letërsisë shqiptare, një juri prej 200 studentësh të letërsisë së Universitetit të Triestes dhe atij të Cassinos përzgjodhën 4 romane të botuara në Itali: “Libero” – Lea Ypi, “Il paese dove non si muore mai” – Ornela Vorpsi, “Aquila nera” – Anita Likmeta dhe “Il sogno italiano” – Ylljet Aliçka.

Ceremonia zyrtare e dhënies së çmimit për shkrimtarin Ylljet Aliçka do të organizohet më 3 tetor në qytetin e Cassinos.

Më parë këtë çmim e kanë marrë nobelisti hungarez Imre Kertesz me romanin “Essere senza destino“, kroati Miljenko Jerkoviç me romanin “Le marlboro di Sarajevo“ si dhe francezja Alice Ferney me romanin “In Guerra”.

Marrë nga Euronews Albania