Zëvendëskryetari i Akademisë së Shkencave të Shqipërisë, akad. Vasil Tole, priti në një takim zëvendësambasadoren e Republikës Çeke në Shqipëri, Irena Žižka dhe albanologun çek Robert Dobra.

Akademia e Shkencave të Shqipërisë njofton se takimi u zhvillua në kuadër të forcimit të bashkëpunimit ndërmjet Akademisë së Shkencave të Shqipërisë dhe institucioneve kërkimore-shkencore të Republikës Çeke, si dhe konsolidimit të marrëdhënieve akademike e kulturore mes dy vendeve.

Në fokus ishte mbështetja për studimin dhe botimin e veprës së albanologut Robert Dobra, “Albania in Czech Visual Memory” (“Shqipëria në kujtesën vizuale çeke”), një nismë e ndërmjetësuar nga Ambasada e Republikës Çeke në Shqipëri.

ASHSH dhe Qendra e Studimit të Artit pranë saj do të krijojë të gjitha lehtësirat e duhura për mbështetjen e hulumtimeve, përgatitjen dhe botimin e këtij studimi të rëndësishëm i cili fokusohet në trashëgiminë e arteve pamore të autorëve çekë, mbi Shqipërinë dhe shqiptarët.

Studimi vlerësohet si një kontribut i rëndësishëm në albanologji dhe në pasurimin e studimeve mbi Shqipërinë në një perspektivë ndërkombëtare.

Burimi ATSH