Shefi i Shtabit të Përgjithshëm të Forcave të Armatosura, gjenerallejtënant Arben Kingji, zhvilloi një vizitë zyrtare në Rumani, në kuadër të forcimit të bashkëpunimit dypalësh dhe angazhimeve të përbashkëta si dy vende anëtare në NATO-s.

Gjenerallejtënant Kingji u prit me një ceremoni zyrtare nga homologu i tij rumun, gjeneral Gheorghiță Vlad, në një atmosferë që pasqyroi marrëdhëniet e qëndrueshme dhe partneritetin e konsoliduar ndërmjet Forcave të Armatosura të dy vendeve.

Në fokus të bisedimeve ishte rritja e ndërveprueshmërisë ndërmjet forcave, përmes stërvitjeve të përbashkëta, shkëmbimit të eksperiencës dhe intensifikimit të bashkëpunimit në kuadër të iniciativave dhe angazhimeve të përbashkëta bilaterale dhe rajonale.

Gjithashtu, delegacionet biseduan mbi zhvillimet më të fundit në mjedisin e sigurisë rajonale dhe ndërkombëtare, duke i kushtuar vëmendje të veçantë sfidave hibride, kërcënimeve asimetrike dhe nevojës për një përgjigje të koordinuar në kuadër të Aleancës së Atlantikut të Veriut.

Në takim u diskutua gjithashtu rëndësia e pjesëmarrjes në misionet dhe operacionet ndërkombëtare të drejtuara nga Aleanca, ku në këtë kontekst, gjenerallejtënant Kingji vlerësoi rolin aktiv të Forcave të Armatosura Rumune në ruajtjen e sigurisë dhe stabilitetit në rajon dhe më gjerë.

Gjatë qëndrimit në Rumani, gjenerallejtënant Kingji, i shoqëruar nga gjenerali Gheorghiță Vlad, vizitoi Komandën e Korpusit Shumëkombësh Jug-Lindje (HQ MNC-SE) në Sibiu, ku u prit nga shefi i shtabit të kësaj komande, gjeneralmajor Costantin Nicolaescu.

Gjatë këtij takim gjeneralletënant Kingji pasi u njoh me kontributin e trupave aleate të dislokuara në Rumani dhe rolin e kësaj komande në Krahun Lindor të Aleancës, nënvizoi se Komanda e Korpusit Shumëkombësh Juglindor përfaqëson një element kyç të strukturës së komandimit dhe kontrollit të NATO-s dhe një shembull konkret të bashkëpunimit shumëkombësh dhe mbrojtjes kolektive.

Më pas, SHSHPFA dhe delegacioni që e shoqëronte zhvilloi një takim me komandantin e Grup-Batalionit të Përparuar të Forcave Tokësore (FLF), kolonel Florian De La Tousche, ku u njoh nga afër me misionin dhe detyrat e kësaj njësie.

Vizita zyrtare e SHSHPFA gjenerallejtënant Arben Kingji, u vlerësua nga të dyja palët si një hap i rëndësishëm në forcimin e mëtejshëm të bashkëpunimit duke riafirmuar angazhimin e përbashkët për paqe, stabilitet dhe siguri në rajon dhe më gjerë. Gjithashtu, ajo konfirmoi rolin thelbësor të bashkëpunimit ushtarak në përballimin e sfidave të përbashkëta.

Vizita zyrtare u përmbyll me zhvillimin e një takimi me ambasadoren e Shqipërisë në Rumani, Enkeleda Mërkuri.

Marrë nga ATSH