Ministri i Shtetit për Pushtetin Vendor, Ervin Demo, bëri të ditur sot se qeveria ka miratuar zonat prioritare në shtatë bashki në kuadër të Paketës së Maleve.

Gjatë një konference për mediet, Demo theksoi se zonat prioritare janë miratuar në “bashkitë Mirditë, Kavajë, Durrës, Vlorë, Berat, Dimal dhe në Librazhd”, të cilat sipas ministrit “janë gati të vijohet me procedurat për sa i përket trajtimit të kërkesave që banorët kanë, për sa i përket përfitimeve që vijnë nga Paketa e Maleve”.

Demo tha se “bashkitë të cilat tashmë i kanë të miratuara zonat prioritare, janë në fazën e publikimit të të gjitha kërkesave, të cilat kanë kaluar filtrat e kontrollit nga vetë bashkitë”.

Sipas tij janë duke u ezauruar afatet 45-ditore dhe pas ezaurimit të afateve, “do të kemi miratimin nga këshillat bashkiakë, nga vetë bashkitë, sa i përket aplikimeve të suksesshme”.

“Paketa e Maleve po ecën me një shpejtësi të konsiderueshme duke marrë në konsideratë që tashmë mbi gjysmën e bashkive e kemi kaluar nëpërmjet zonave prioritare dhe do të vijojmë dhe në javët në vijim të miratojmë zonat prioritare për bashkitë të cilat kanë mbetur akoma dhe janë duke u trajtuar për zonat prioritare”, tha Demo.

I pyetur në lidhje me Komisionin e Posaçëm për Reformën Territoriale, Demo tha se e rëndësishme është të krijojmë qasjen e duhur në mënyrë që të kemi bashki më të forta nesër.

Ai u shpreh besimplotë që komisioni do të bëjë punën e tij dhe shtoi se “mazhoranca ka papërgjegjësinë për të ofruar zgjidhje dhe për të çuar para reformën”.

“Ne jemi po ashtu shumë të hapur që kjo të jetë një reformë e cila përfshin brenda vetes të gjitha palët dhe komisioni i posaçëm realizon këtë gjë”, tha ai.

Burimi ATSH